संबिधान बनेको राती खाए २ पेग : प्रचण्ड

श्रीमतीसंग ५ रुपैया लिएर फिल्म, किचेनमा पस्यो कि फोहोर

एकीकृत माओवादीका अध्यक्ष पुष्पकमल दाहाल ‘प्रचण्ड’का बानी र स्वभावबारे बजारमा थरीथरीका कुरा सुनिन्छन् । कति सत्य होलान्, कति अफवाह । प्रचण्डका बानी र स्वभावबारे पत्नी सीता दाहाललाई नयाा पत्रिकाका खगेन्द्र पन्तले १०१ प्रश्न सोधेका छन् :


उठ्ने/सुत्ने

१) बिहान कति बजे उठ्नुहुन्छ ?

प्राय: पाँच बजे उठ्नुहुन्छ । म साढे चार बजे उठ्छु ।

२) आफैँ उठ्नुहुन्छ कि तपार्इंले उठाउनुपर्छ ?

कहिले आफँै उठ्नुहुन्छ । कहिले थाकेका दिन, अबेर सुतेका दिन भने ‘ए बुढा अब त उठ्ने वेला भयो’ भनेर मैले ब्युँझाउनुपर्छ ।

३) चिया/कफी के रुचाउनुहुन्छ ?

स्वास्थ्य ठीक छैन, चिया/कफी केही लिनुहुन्न अचेल । ग्रिन टी हो, हामीले खाने ।

४) एक्सरसाइज गर्नुहुन्छ कि गर्नुहुन्न ?

गर्नुहुन्छ । हरेक दिन बिहान टेबुल टेनिस खेल्नहुन्छ ।

५) कोसँग कहाँ खेल्नुहुन्छ ?

घरमै खेल्नुहुन्छ, सुरक्षाकर्मी भाइहरूसँग ।

६) खेल्ने बानी पहिलेदेखि नै थियो ?

पहिलेदेखिको त होइन, सुगर देखिएपछि खेल्न थाल्नुभएको हो ।

७) राति कतिखेर सुत्नुहुन्छ ?

केही कार्यक्रम, बैठक छैनन् भने सामान्यतया साढे दश/एघारमा सुत्नुहुन्छ ।

८) घरमा बस्दा कस्ता लुगा लगाउन मन पराउनुहुन्छ ?

ट्रयाक–सुट लगाउनुहुन्छ ।

९) कुन पेस्ट प्रयोग गर्नुहुन्छ ?

कुन हो त्यो त बिर्सेँ, तर सबैले उहिलेदेखि प्रयोग गर्ने एउटै ब्रान्डको पेस्ट हो । उहाँले प्रयोग गर्ने छुट्टै हुन्न ।

१०) साबुन कुन प्रयोग गर्नुहुन्छ ?

हामीले पहिल्यैदेखि लिरिल साबुन प्रयोग गर्छौँ । उहाँले कहिलेकाहीँ ‘यस्तो साबुनले नुहाउने हो अहिले पनि’ भन्नुहुन्छ । तर, प्राय: त्यसैले नुहाउँछौँ ।

११) सेम्पु कुन प्रयोग गर्नुहुन्छ ?

पहिला अर्कै लगाउनुहुन्थ्यो, अचेल कपाल झर्न थालेपछि हिमालय ब्रान्डको सेम्पु प्रयोग गर्नुहुन्छ ।

१२) कपालमा जेल पनि लगाउनुहुन्छ ?

जेल न सेल केही लगाउनुहुन्न, बाबु । नचाहिने हल्ला धेरै चलेका छन् । केही लगाउनुहुन्न ।

१३) कपालमा तेल त लगाउनुहुन्छ ?

त्यो त लगाउनुहुन्छ ।

१४) जुँगामा मेहन्दी लगाउनुहुन्छ कि हुन्न ?

केही पनि लगाउनुहुन्न । लगाउने भए कि कालो हुनुपथ्र्यो कि रातो हुन्थ्यो नि । सेतो हुन्थ्यो र ?

१५) उहाँको ‘हेयर स्टाइल’ तपाईंलाई मन पर्छ कि पर्दैन ?

मन पर्छ । पहिला युद्धकालका वेला कपाल काट्दा म पनि सँगै जान्थेँ । उहाँले हजाम भाइलाई ‘छोटो बनाइदेऊ’ भन्नुहुन्थ्यो । मैले छोटो बनाउन दिन्नथेँ । ‘उहाँले भनेर हुँदैन, अलिकति लामै राख’ भन्थेँ, हजाम भाइलाई । म कराएपछि उहाँ पनि मान्नुहुन्थ्यो । कपाल छोटो बनाएको उहाँलाई राम्रो देखिँदैन । अहिले पनि छोटो बनाउनुहुन्न ।

१६) एकदम टिपटप देखिनुहुन्छ, त्यसमा तपाईंको भूमिका कत्तिको छ ?

त्यो त यस्तो हो, राम्रो देखिन ज्यान पनि मिलेको हुनुपर्छ । कसैले जस्तोसुकै लुगा लगाए पनि राम्रो देखिन्छ । कसैलाई देखिन्न ।

१७) ‘यस्तो लुगा लगाउनुस्, राम्रो देखिन्छ,’ भनेर तपाईंले पनि भन्नुहुन्छ होला नि ? भन्छु मैले पनि ।

१८) तपाईंका अरू शीर्ष नेताका पत्नी वा परिवारका सदस्य भेट हुँदा उहाँ कस्तो टिपटप देखिनुभएको भन्छन् होला नि ?

सबैसँग त भेटघाट पनि हुँदैन । आरजुजीसँग भेट हुँदा उहाँले भने भन्नुहुन्छ । उहाँहरूसँग राम्रो सम्बन्ध पनि छ ।

पत्रपत्रिका/टेलिभिजन

१९) पत्रपत्रिका कत्तिको पढ्नुहुन्छ ?

पढ्नुहुन्छ । तर, फुर्सद नै पाउनुहुन्न ।

२०) कतिखेर पढ्नुहुन्छ ?

फुर्सद भयो भने बिहान नै हो पढ्ने ।

२१) टेलिभिजन कति हेर्नुहुन्छ ?

हेर्नुहुन्छ ।

२२) कतिखेर हेर्नुहुन्छ ?

फुर्सद भए बिहान पनि हेर्नुहुन्छ । प्राय: राति हेर्नुहुन्छ । त्यो पनि कहिलेकाहीँ म कराउँछु ।

२३) किन नि ?

(हाँस्दै) कि नेपाली च्यानल लगाउनुस् कि बन्द गर्नुस् भन्छु । कहिले त रिमोट नै खोस्छु ।

२४) आफूबारे छापिएका समाचार पढेपछि कस्तो प्रतिक्रिया जनाउनुहुन्छ ?

राम्रो समाचार छ भने त केही भन्नुहुन्न । नभएको समाचार रहेछ भने ‘कस्तो हावा लेखेको रहेछ’ भन्नुहुन्छ ।

२५) कस्ता समाचारले उहाँलाई निराश बनाउँछ ?

हुँदै नभएका कुराहरू लेखेपछि त टेन्सन भइहाल्छ नि । त्यस्ता समाचार राम्रो मान्नुहुन्न ।

२६) पत्रपत्रिकामा आफ्ना कार्टुन छापिएको देख्दा कस्तो प्रतिक्रिया जनाउनुहुन्छ ?

हाँस्नुहुन्छ । ‘ओहो, कस्तो ठ्याक्कै मिलाएछ’ भन्नुहुन्छ ।

खाना/खाजा

२७) बिहानको खाजामा के लिनुहुन्छ ?

उहाँले पुरी, तरकारी, दही, पराठा मन पराउनुहुन्छ । तर, सुगर र प्रेसरको समस्या छ, सकभर त्यस्तो खाजा म दिन्नँ । सुक्खा रोटी, तरकारी, दूध दिन्छु । दिउँसो प्राय: खाजा खाइन्न ।

२८) खानामा के मन पराउनुहुन्छ ?

दाल, भात तरकारी, हरियो रायोको साग मन पराउनुहुन्छ ।

२९) माछामासु कत्तिको रुचाउनुहुन्छ ?

त्यस्तो एकदमै रुचाउने भन्ने छैन । कहिले खाइन्छ, कहिले खाइन्न ।

३०) रातिको खानामा के रुचाउनुहुन्छ ?

रातिमा प्राय: मकैको च्याँख्ला, ढिँडो, दाल र तरकारी खान्छौँ । धेरै परिकार पकाउँदैनौँ ।

३१) उहाँलाई एकदम मन पर्ने खाना के हो ?

मासको दाल, कलकलाउँदो रायोको साग, यस्तै नेपाली खाना ।

३२) किचनमा पस्नुहुन्छ कि पस्नुहुन्न ?

आउन त खोज्नुहुन्छ कहिलेकाहीँ । तर, म नै पस्न दिन्नँ ।

३३) किन नि ?

उहाँले पकाउन थाल्नुभयो भने यता नि फोहोर, उता नि फोहोर पार्नुहुन्छ । मलाई त्यस्तो मन पर्दैन । त्योभन्दा त ‘भयो जानुस्’ भन्छु ।

३४) भनेपछि खाना पकाउन रुचि देखाउनुहुन्छ ?

रुचि त देखाउनुहुन्छ । समय नै पाउनुहुन्न । उहिल्यैदेखि उहाँ किचनको काम गर्नुहुन्थ्यो ।

३५) कस्तो काम गर्नुहुन्थ्यो ?

हामी युद्धमा भएका वेला बाँडीचुँडी काम गथ्र्यौँ । उहाँ आफैँ पनि खटिनुहुन्थ्यो हरेक दिन । त्यतिवेला हामीसँगै छोरा प्रकाश पनि हेडक्वार्टरमै थियो, अरू स्टाफ थिएनन् । उसको जिम्मा पोछा लगाउने, लुगा धुने हुन्थ्यो । मैले खाना बनाउँथँे र बुढाको भागमा भाँडा धुने काम थियो । प्राय: आफ्नो भागको काम आफैँ गर्नुहुन्थ्यो, कहिलेकाहीँ प्रकाशले पनि गरिदिन्थ्यो ।

युद्ध र जीवन

३६) लामो सशस्त्र युद्धको नेतृत्व गर्नुभयो, दु:ख/खुसी कस्तो मान्नुहुन्छ ?

सबै अनुभव भयो । दु:खका घटना गनीसाध्य छैनन् । बाँचेर यसरी काठमाडौं आउँला भनेर कसले सोचेको थियो र ? कहिलेकाहीँ देशको अवस्था देख्दा त्यतिवेलै सहिद भएको भए हुन्थ्यो भन्ने लाग्छ ।

३७) युद्धका वेला जिउँदै नेता मारिएका समाचार पनि आउँथे, पढ्दा/सुन्दा कस्तो लाग्थ्यो ?

कति हो कति आए, त्यस्ता समाचार । अचम्म लाग्थ्यो । यी पत्रकारले के लेख्दा हुन्जस्तो लाग्थ्यो ।

३८) परिवारकै सदस्य मारिएका समाचार पनि सुन्नुभयो ?

हो नि । हामी नै मारिएको समाचार पनि आए कतिपल्ट । सुनेर हाँस्थ्यौँ, नबुझीकन के लेख्दा हुन् पत्रकारले भन्ने पनि लाग्थ्यो ।

३९) त्यतिवेला कुनै दिन भोकभोकै पनि बस्नुभयो ?

झुटो बोल्नुहुन्न बाबु । भोकभोकै त कहिल्यै बसेनौँ । जनताका घरमा बसेका हुन्थ्यौँ । गच्छेअनुसार उनीहरूले राम्रै खाना खुवाएर राख्थे ।

फिल्म/गीत–संगीत

४०) फिल्म हेर्न रुचाउनुहुन्छ कि रुचाउनुहुन्न ?

रुचाउनुहुन्छ, हेर्नुहुन्छ । कत्ति पनि मन नपराउने त म हो । यो कुरा बाबुरामजी, हिसिलाजीलाई पनि थाहा छ ।

४१) अंग्रेजी, हिन्दी, नेपाली कस्ता फिल्म रुचाउनुहुन्छ ?

हिन्दी हेर्नुहुन्छ ।

४२) हलमै गएरै कति हेर्नुहुन्छ ?

धेरै कम जानुहुन्छ । कहिलेकाहीँ जाने हो, नत्र टेलिभिजनमै हेर्नुहुन्छ ।

४३) कतिखेर हेर्नुहुन्छ टेलिभिजनमा ?

राति सुत्ने वेला हेर्नुहुन्छ ।

४४) परिवारका सदस्यसँग बसेर फिल्म कति हेर्नुहुन्छ ?

कहिलेकाहीँ हेर्नुहुन्छ ।

४५) टेलिभिजनमा सिरियल हेर्नुहुन्छ कि हेर्नुहुन्न ?

सिरियल त हेर्नुहुन्न ।

४६) गीत कत्तिको सुन्नुहुन्छ ?

गीत–संगीत त एकदमै मन पर्छ उहाँलाई ।

४७) कस्ता गीतहरू सुन्नुहुन्छ ?

प्राय: नेपाली लोक गीतहरू सुन्न मन पराउनुहुन्छ ।

४८) लोकगीतमा आनन्द मानेर कहिलेकाहीँ नाच्ने पनि गर्नुहुन्छ कि ?

त्यस्तो नाँच्ने त होइन, कहिलेकाहीँ नाच्नु पनि भएको छ ।

रेस्टुरेन्ट/खाजा

४९) खाना/खाजा खान बाहिर रेस्टुरेन्ट कति जानुहुन्छ ?

जानुहुन्न बाहिर त ।

५०) कहिलेकाहीँ बाहिर गएर खाउँ भन्ने लाग्दैन ?

एक नम्बरमा त मलाई नै त्यस्तो मन पर्दैन । जस्तो होस्, घरमै पाकेको खान मन लाग्छ । उहाँलाई पनि अचेल बाहिरको खान मिल्दैन बिरामी भएका कारण ।

घर–परिवार

५१) लाजिम्पाटमा परिवारका सदस्य को–को बस्नुहुन्छ ?

अहिले त कोही पनि छैन, हामी बुढाबुढी मात्रै हो ।

५२) तपाईंसँग राजनीतिक गफ कति गर्नुहुन्छ ?

गर्नुहुन्छ । पार्टीभित्रको र समग्र राजनीतिको विषयमा पनि कुराकानी हुन्छ ।

५३) तपार्इंले राजनीतिक सुझाब कत्तिको दिनुहुन्छ ?

दिन्छु मैले पनि ।

५४) तपाईंको सुझाब मान्नुहुन्छ कि मान्नुहुन्न ?

मान्नुहुन्छ । मैले भनेका र दिएका सुझाब नै अहिलेसम्म लागू हुँदै आएका छन् । यो कुरा पार्टीलाई पनि थाहा छ, उहाँलाई पनि थाहा छ । पछिल्लो समय ‘जसरी पनि संविधान बनाउनुपर्छ’ भनेर मैले पटक–पटक उहाँलाई भन्ने गरेकी थिएँ ।

५५) पछिल्ला दिनहरूमा तनाव कत्तिको लिनुभएको थियो ?

एकदम तनाव नै थियो ।

५६) कुन विषयमा ?

यिनै कुराहरूमा नि । संविधान बन्छ कि बन्दैन, दलहरूले के गर्छन्, नेताहरूले के गर्छन् भन्ने विषयमा ।

५७) आफ्नै पार्टीका नेताहरूबाट पनि संविधान निर्माणमा असहयोग भयो भन्ने गुनासो कति गर्नुहुन्थ्यो ?

असहयोग भएकै हो नि । कुरा गर्नुहुन्छ ।

५८) परिवारका बाहिर रहेका सदस्य र आफन्तलाई बोलाएर सँगै खाने, गफ गर्ने कति गर्नुहुन्छ ?

गर्नुहुन्छ नि । आज(बिहिबार) बिहान मात्रै माइली छोरी आएकी थिई । उसलाई ‘पराठा पका’ भन्नुभयो । छोरीले ‘आलु पराठा त आमाले तपाईलाई खान दिनुहुन्न’ भन्दै थिई । ‘जे को बनाएपनि बना’ भन्नुभयो । अनि, प्याज मसिनो गरेर काटेर पराठा बनायौं ।

५९) मन लागेको खान नपाउँदा त्यस्तो वेला तपाईसँग झर्किने कत्तिको गर्नुहुन्छ ?

कहिले काँही अलिअलि झर्किनुहुन्छ ।

लुगा/पहिरन

६०) आफूले लगाउने लुगामा कत्तिको सचेत हुनुहुन्छ ?

लुगामा त एकदम सचेत हुनुहुन्छ ।

६१) के लगाउन रुचाउनुहुन्छ ?

कोट, पाइन्ट, सर्ट लगाउन रुचाउनुहुन्छ ।

६२) आइरन आफैँ गर्न जान्नुहुन्छ कि जान्नुहुन्न ?

पहिला–पहिला त गर्नुहुन्थ्यो । अचेल गर्नुहुन्न । युद्धकालमा त ‘लौ न मेरो साडीमा पनि आइरन गर्न सघाइदिनुस्’ भन्यो भने सघाइदिनुहुन्थ्यो ।

६३) उहाँको लुगामा तपाईंले आइरन कत्तिको गरिदिनुहुन्छ ?

मैले त गरिदिन्नँ बाबु, नगरेको कुरा गर्छु कसरी भन्नु ?

६४) नजानेर नगर्नुभएको कि फुर्सद नभएर ?

नजानेर नगरेको हो । सिकेको भए त जानिन्थ्यो पनि होला, सिकिएन ।

६५) उहाँका लागि लुगा कसले किनिदिन्छ ?

हामीले नै किनिदिन्छौँ । प्राय: छोराले ल्याइदिन्छ, छोरीहरूले ल्याइदिन्छन् ।

६६) लुगा किन्न आफैँ पसलसम्म पुग्नुभएको छ कि छैन ?

१०/११ वर्ष भयो, पसलमा आफैँ किन्न जानुभएको छैन ।

६७) उहाँले कस्तो रङको लुगा धेरै मन पराउनुहुन्छ ?

सर्ट सेतो रङको मन पराउनुहुन्छ । पाइन्ट र कोट कालो मन पराउनुहुन्छ ।

६८) कहिले कालो चस्मा लगाउन भएको छ कि छैन ?

कालो चस्मा त लगाउनुहुन्न ।

तलब/खर्च

६९) आफ्नो तलब तपाईंलाई दिनुहुन्छ कि हुन्न ?

सबै घरको हेर्ने मैले नै हो । पैसा पनि मैले नै राख्छु ।

७०) आफूले कति राख्नुहुन्छ ?

आफूले राख्नुहुन्न । मैले नै उहाँको पर्समा राखिदिने हो ।

७१) कति राखिदिनुहुन्छ ?

दुई/चार हजार राखिदिन्छु । त्यो पनि कसैले झिकिदिन्छन् कि, कसैलाई दिनुहुन्छ कि भन्ने हुन्छ ।

७२) एक दिन राखिदिएको पैसा कति दिन पुर्‍याउनुहुन्छ ?

पाँच/सात दिन पुर्‍याउनुहुन्छ । उहाँको खर्च केहीमा पनि हुन्न ।

७३) तपाईंसँग पैसा कत्तिको माग्नुहुन्छ ?

माग्नुहुन्छ । ‘पर्स रित्तो भयो, पैसा देऊ’ भन्नुहुन्छ, अनि मैले अड्कलेर राखिदिन्छु ।

७४) सबैभन्दा धेरै रकम कति दिनुभएको छ ?

१० हजारसम्म दिएकी छु ।

७५) किन यति धेरै ‘टाइट’ गर्नुभएको नि ?

टाइट होइन नि । मैले घर पनि त चलाउनुपर्‍यो नि ।

७६) उहाँलाई पैसा दिएको घटना जुन तपाईंलाई एकदमै याद आउँछ ?

उहिलेको घटना हो । हाम्रो सानैमा बिहे भएको । उहाँ पनि अल्लारे केटो नै हुनुहुन्थ्यो । एक दिन फिल्म हेर्न मन लागेछ । म खेतमा मल बोक्दै थिएँ, पैसा माग्नुभयो । मैले पाँच रुपैयाँ दिएँ । अनि, खुसी हुँदै फिल्म हेरेर आउनुभयो । त्यो घटना एकदम सम्झिन्छु ।

रिसाउने/खुसी हुने

७७) रिसाउने बानी कति छ ?

मभन्दा उहाँको रिस कम हो । म अलि लामो समय रिसाउँछु बरु । उहाँ त एकछिन मात्रै रिसाउनुहुन्छ ।

७८) कस्ता कुरामा रिसाउनुहुन्छ ?

कहिलेकाहीँ स–साना कुरा, कहिले राजनीतिक कुरामा पनि रिसाउनुहुन्छ । रिसाउनेभन्दा पनि ‘बहस’ हुन्छ भनौँ ।

७९) बुढाबुढी रिसाउँदा पहिले को बोल्नुहुन्छ ?

पहिला उहाँ नै बोल्नुहुन्छ । अहिलेसम्मको इतिहासअनुसार उहाँ नै पहिले बोल्ने हो । उहाँ बोलेपछि म पनि बोलिहाल्छु ।

८०) रिसले वा मायाले कहिल्यै पिट्नुभएको छ ?

पहिले–पहिले पिट्नुभयो होला, त्यस्तो ठ्याक्कै याद छैन । हामीबीच रिस भन्ने कहिल्यै भएन, त्यसैले मायाले नै पिट्नुभयो होला । न कहिले मैले उहाँमाथि शंका गरेँ, न उहाँले नै ममाथि शंका गर्नुभो ।

८१) माया गरेर तपाईंलाई के भनेर बोलाउनुहुन्छ ?

माया गरेर बोलाउने नाम त छुट्टै छ, नभनौँ अहिले ।

दु:खी र खुसी

८२) कस्ता कुरामा खुसी मान्नुहुन्छ ?

देशको माहोल, राजनीति सबै ठीक ठाउँमा आयो भनेपछि खुसी हुनुहुन्छ ।

८३) पछिल्लो समय कहिले खुसी हुनुभयो ?

संविधान बनेकोमा खुसी हुनुभो ।

८४) कहिलेकाहीँ गीत गुनगुनाउनुहुन्छ कि हुन्न ?

कहिलेकाहीँ त गुनगुनाउनुहुन्छ ।

८५) कस्तो वेला ?

कपडा लाउने वेला र अलि खुसी भएको वेलामा गुनगुनाउनुहुन्छ । खुसी भएको वेला त उहाँलाई सम्हाल्नै पनि गाह्रो हुन्छ । अरूलाई भन्दा पनि मलाई गाह्रो हुन्छ ।

८६) त्यस्तो कुनै घटना सुनाउनु न ?

माओवादीले दाङको होलेरी हानेको वेला हामी भारत जयपुरको होटेलमा बसेका थियौँ, दुई दिनसम्म राति–राति गाडीको गाडीमै हिँड्यौँ । होटेलमा बसौँ, इन्डियन च्यानलहरूले सबै फोटो देखाइरहेका थिए, पक्राउ परिएला भन्ने डर । आग्रा, आग्राबाट जयपुर, तीन रात गाडीमै हिँड्यौँ । त्यो वेला उहाँ एकदमै खुसी हुनुभाथ्यो । ‘चुप लागेर बस्नुस् है, अरूले चिन्लान्’ भनेर उहाँलाई अलिकति कन्ट्रोल नै गर्नुपर्‍यो ।

उपहार

८७) तपाईंलाई उपहार कतिको दिनुहुन्छ ?

जन्मदिनका दिन ‘केक ल्याएर मनाउनुपर्छ’ भन्नुहुन्छ । ‘ममीले के भन्छे, त्यो ल्याइदेओ’ भनेर छोराछोरीलाई अह्राउनुहुन्छ ।

८८) अरू उपहार दिनुहुन्न ?

अहिलेसम्म त्यस्तो केही ल्याइदिनुभएको छैन । उहिले उहाँले गोरखाको आरुघाटमा पढाउँदा म २२/२३ वर्षकी थिएँ होला । दुइटी छोरी जन्मिसकेका थिए । त्यो वेला एउटा कटनको साडी ल्याइदिनुभएको थियो । त्यो कहिल्यै बिर्सिन्नँ म । त्यो साडीको त कलर नि बिर्सन्नँ, गुलाबी–गुलाबी रङको थियो ।

रक्सी/चुरोट

८९) केही अम्मल छ कि छैन ?

यो उमेरसम्म कहिल्यै ढाँटिएन, अलि–अलि खानेलाई खाने त भन्नैपर्छ ।

९०) चुरोट खैनी खानुहुन्छ कि खानुुहुन्न ?

अहिले चुरोट, खैनी केही खानुहुन्न । पहिला अलि–अलि चुरोट खानुहुन्थ्यो । अरूजस्तो पूरै प्याकेट किन्नेचाहिँ होइन । एउटा किन्ने, फेरि खान मन लागे अर्को किन्ने ।

९१) छाडेको कति भयो ?

११ वर्ष जति भयो होला छाडेको ।

९२) कुन चुरोट खानुहुन्थ्यो ?

याक होला भन्छु है म ।

९३) रक्सी खानुहुन्छ कि खानुहुन्न ?

रक्सी पनि त्यस्तो धेरै होइन, कहिलेकाहीँ खाने हो एक/डेढ प्याग । खानुपर्दा मैले नै हालिदिने हो । सुगर छ, प्रेसर छ, ‘यतिभन्दा धेरै खानुहुन्न’ भनेर अड्कलेर हालिदिन्छु । धेरै दिँदा दुई प्याग दिने हो ।

९४) अस्ति संविधानसभाले नयाँ संविधान बनायो, त्यो खुसीमा कति खानुभयो ?

संविधान बनाएर आएपछि ‘थोरै खाउँ न त’ भन्नुभयो । दुई प्याग दिएँ ।

९५) एकपटक रक्सी खाएर चस्मा नै बिर्सिनुभएको थियो, थाहा पाएपछि तपाईंले केही भन्नुभयो ?

त्यो त वाहियात कुरा रहेछ । उहाँलाई सोधेँ, गाली पनि गरेँ । ‘चस्मा छोडेको होइन, बिर्सिएर छुटेको हो’ भन्नुभो । अलि–अलि त खानुभएकै हो, तर चस्मा छुट्ने गरी खानुभएको थिएन । बढाएर भने मान्छेहरूले ।

९६) युद्धकालमा कति रक्सी खानहुन्थ्यो ?

युद्धकालमा रोल्पातिर हुँदा पासाङजी हुनुहुन्थ्यो, उहाँसँग बसेर कहिलेकाहीँ कोदोको खानुहुन्थ्यो ।

फोन/इन्टरनेट

९७) सामाजिक सञ्जालमा कति रमाउनुहुन्छ ?

उहाँ चलाउनुहुन्न । म पनि ‘नचलाउनुस्’ भन्छु ।

९८) किन नि ?

मलाई मन पर्दैन । यता हेर्‍यो, उता हेर्‍यो दिमाग खराब मात्रै । हस्तक्षेप नै गर्ने कुरा त आउँदैन । उहाँले पनि चलाउन त्यति मन गर्नुहुन्न ।

ठट्टा/रमाइलो

९९) ठट्टा गर्ने, रमाइलो गर्ने बानी कति छ ?

हाँस्ने, रमाइलो गर्न भने मन पराउनुहुन्छ ।

१००) जोकहरू सुन्ने/सुनाउने कति गर्नुहुन्छ ?

त्यो त गर्नुहुन्न ।

१०१) सार्वजनिक कार्यक्रममा तपार्इंलाई प्राय: हाँसेको देखिँदैन, घरमा उहाँले हँसाउन कोसिस कति गर्नुहुन्छ ?

म त्यति हाँस्ने, हाहा–हुहु गर्दिनँ । म यो कुरा स्विकार्छु । तर, घरमा त हाँसिहाल्छु नि । हाँस्ने कुरामा हाँसिन्छ, सिरियस हुने कुरामा सिरियस भइन्छ ।



भिडियोको लागि तल क्लिक गर्नुहोस् ।