श्रीमती घरमा नभएको मौका छोपी बाबुद्वारा नाबालिका छोरीमाथि करणी गरेको खुलासा

दीपकअनुरागी आचार्य
कपिलवस्तु, असोज ७– कपिलवस्तु थुन्हिया ७, नयाँबस्तीका ३२ वर्षीय शुक्रराज गिरीले घरमा श्रीमती नभएको मौका छोपी आफ्नै ११ वर्षीय छोरी सुन्दली (नाम परिवर्तित) माथि यौन दुव्र्यवहार गरेको खुलासा भएको छ । श्रीमती दाङ गएको बेला गत भदौ २६ गते राति उनले आफ्नै छोरीलाई जबरजस्ती करणी गरेका हुन् । सोही ठाउँकी ७ वर्षीय अबोध बालिकालाई स्थानीय आनन्द वि.क.ले यौन दुव्र्यवहार गरेको घटना बाहिर आएपछि ती बालिकाले आफ्नो बाबुको कर्तुत बाहिर ल्याएकी हुन् । छोरीलाई डरधम्की दिई घटना लुकाइएको भएपनि हप्ता दिनपछि पीडित छोरीले आफैंले आमा र छिमेकीलाई बताएकी थिइन् । छोरीले घटनाबारे बताएपछि यौनाङ्ग हेर्दा सुन्निएको छिमेकीले बताए । घटना खुलासासँगै छिमेकीको सूचनाको आधारमा प्रहरी त्यहाँ पुगेको थियो । प्रहरीको आएको थाहा पाउने बित्तिकै अधर्मी बाबु फरार भएको वडा प्रहरी कार्यालय चन्द्रौटाका प्रहरी निरीक्षक सन्तोष रोकाले जानकारी दिए । घटनाबारे बुझ्न अधिकारकर्मी, संचारकर्मीको टोली त्यहाँ पुगी यथार्थ जानकारी लिएका थिए ।
नाबालिकामाथि बलत्कार जस्ता जघन्य अपराध हुँदा समेत प्रहरीले चासो नदेखाएको आरोप लगाउँदै मानव अधिकारका क्षेत्रमा कार्यरत विभिन्न संघ–संस्थाले गम्भीर ध्यानाकर्षण गराएका छन् । जिल्लाका पश्चिमी क्षेत्रका अधिकारकर्मी र संचारकर्मीको टोलीले संयुक्त प्रेस विज्ञप्ती प्रकाशित गर्दै घटनाका दोषीलाई तत्काल पक्राउ गरी कानुनी कारबाही गर्न जोडदार माग गरेका छन् । अधिकारकर्मी र संचारकर्मीको टोली वडा प्रहरी कार्यालय पुगी प्रहरी निरीक्षक सन्तोष रोकालाई प्रेस विज्ञप्ती बुझाएका थिए ।