कोसीयारीलाई सजिलै प्रचण्डसँग भेट्न नदिने काम अरु कसैले नभई प्रधानमन्त्री पुत्र एवं स्वकीय सचिव प्रकाश दाहालले गरेका हुन् । कोसियारीले गत मंगलबार प्रचण्डसँग भेट्न खोजेका थिए । कोसियारीका विश्वासपात्र एक नेपाली पत्रकारले प्रकाशलाई टेलिफोन गरी प्रधानमन्त्रीको समय मागेका थिए । तर, प्रकाशले कडा जवाफ दिए ।
‘प्रधानमन्त्रीले भेट्नुहुन्छ, तर, भारतीय दूतावासमार्फत आउनुपर्छ’, प्रकाशले ती पत्रकारलाई भने । तर पत्रकारले सिधै भेटाउन चाहे । ‘कोसियारी नेपालप्रति सधैं सदभाव राख्ने र नेपालमा स्थायित्व होस् भन्ने पवित्र मनसायका नेता हुन्, उनलाई प्रधानमन्त्रीसँग भेट्न यति गाह्रो किन ?’ । प्रकाशले जवाफ दिए, ‘यो हाम्रो कुटनीतिक सिस्टम हो, यसमा म केही गर्न सक्दिन ।’ त्यसपछि कोसीयारीले नेपालस्थित भारतीय दूतावसले मिलाइदिएको समयमा बुधबार प्रधानमन्त्रीलाई भेटे । कोसियारी भारतीय प्रधानमन्त्री नरेन्द्र मोदीका विश्वासपात्र र नेपाल विज्ञ हुन् ।
भारतको चासो हिन्दू गणतन्त्र
बालुवाटारमा भएको भेटमा कोसियारीले नेपालको स्थायित्व र विकासका लागि भारत सदैव सहयोग गर्न तयार रहेको बताए । उनले असन्तुष्ट मधेसी मोर्चालाई समेत विश्वासमा लिएर स्थानीय तहको निर्वाचन गराउन सुझाव दिए । भेटमा कोसियारीको मुख्य चासो नेपाल हिन्दू राष्ट्र हुनुपर्नेमा थियो । उनले राजतन्त्र पुनस्र्थापनामा भारतको कुनै चासो नरहेको पनि प्रष्ट्याए ।
‘हामी नेपालमा राजतन्त्र फर्कियोस् भन्ने चाहन्नौं’, कोसियारीको भनाइ उद्धृत गर्दै स्रोतले भन्यो, ‘तर नेपाल हिन्दू गणतन्त्र हुनुपर्छ ।’ उनले भारत पनि हिन्दू राज्य घोषणा हुने बताए ।
