काठमाडौं, २४ फागुन । सरकारको आयु छोटिदै गर्दा प्रचण्डका आसेपासेहरू पैसा असुल्न व्यस्त छन् ।
चुनावका लागि भन्दै अनेक सेटिङ मिलाएर सचिवालयका व्यक्तिहरूले पैसा उठाइरहेका छन् । प्रचण्ड निकटका दलालदेखि गुन्डाहरूसम्म यतिबेला मालामाल भएका छन् ।
प्रकाश दाहालमार्फत प्रधानमन्त्रीसँग सजिलै सेटिङ मिलाएर उनीहरूले पैसा कमाइरहेका छन् । दृष्टि साप्ताहिकले समाचार छापेको छ ।
ललितपुरका गुन्डा नाइके मधु डोटेलले प्रधानमन्त्रीपुत्र प्रकाश दाहालसँग मिलेर अवैध धन्दा सुरु गरेका छन् । केही वर्षयता बन्द रहेको चापागाउँस्थित खानी एक महिनायता सञ्चालनमा आएको छ ।
डोटेलको प्रस्तावमा प्रकाशले नै जिल्ला विकास समिति, सिडियो कार्यालय र प्रहरीमा सेटिङ मिलाएर खानी खोलेको प्रजिअ स्रोतले बताएको छ ।
यसमा माओवादी केन्द्रका सांसद योगेन्द्र घिसिङको पनि मिलोमतो रहेको स्रोत बताउँछ । नुवाकोटका ठेकेदार शारदा अधिकारीले स्थानीय विकासमन्त्री हितराज पाण्डेलाई त्यसमा सेटिङ मिलाएका थिए । अधिकार पनि प्रचण्डका विश्वासपात्र व्यक्ति मानिन्छन् ।
