कांग्रेस र माओवादीलाई पहारीको चुनौति- सक्छौ भने सरकार ढाल, बाहिर धेरै नभुक

काठमाडौं, १६ असार । युवा संघ नेपालका अध्यक्ष राजीव पहारीले सरकार परिवर्तन गरेर देखाउन कांग्रेस र माओवादी केन्द्रलाई चुनौति दिएका छन् ।

दोस्रोपटक माओवादी र कांग्रेसका नेताहरुबाट केपी ओली नेतृत्वको वर्तमान सरकार परिवर्तनको चर्चा सुरु भएसँगै युवा नेता पहारीले सामाजिक सञ्जालमार्फत प्रतिपक्षी कांग्रेस र सत्ता साझेदार माओवादीलाई संसदबाट सरकार परिवर्तन गर्न चुनौति दिएका हुन् ।
उनले लेखेका छन्- ‘सक्छौ भने संसदबाट सरकार हटाएर देखाऊ किन बाहिर स्याल हुईयाद्वारा रोदन पोख्नुपर्यो कांग्रेस र माओबादीका मित्रहरू ।’
संविधान कार्यान्वयको दिशामा अगाडि बढिरहेको, लोकप्रिय बजेटमार्फत मुलुक समृद्धको जग खडा भइरहेको, राष्ट्रिय स्वाधिनताले उचाइ लिइरहेको, नेपालमा सरकार छ भन्ने आम जनता र देश विदेशमा महसुस भइरहेको र मधेस आन्दोलन शिथिल भइरहेको बेलामा विदेशीहरुको इशारामा कांग्रेस र माओवादीका नेताहरुले सरकार परिवर्तन हल्ला चलाउनु नेपालको छवि धुमिलो पार्नका लागि भएको पहारीको आरोप छ ।
‘संसदमा सिधै अविश्वासको प्रस्ताव ल्याएर सरकार परिवर्तन गरे भो । किन होहल्ला गर्ने ? यो सब नेपालको छवि धुमिलो पार्ने, नेपालको विकास र समृद्धि अघि बढ्न नदिने, संविधान कार्यान्वयन हुन नदिने खेल हो,’ उनले भने ।
पहिलोपटक सरकार परिवर्तनको निर्णय लिँदा माओवादीलाई पछुतो भएर निर्णय फिर्ता लिएको स्मरण गर्दै पहारीले यदि सरकार छाड्ने निर्णय गरे अहिले पनि त्यही अवस्था दोहोरिने ठोकुवा गरे ।
पछिल्लो समय कांग्रेस र माओवादीका नेताहरु एमाले अध्यक्ष केपी ओली नेतृत्वको सरकार ढाल्न दिनरात लागिपरेका छन् ।