‘त्यही भएर उहाँलाई दाह्री काट्नै दिन्नँ’ कांग्रेस नेता विमलेन्द्र निधिबारे पत्नी अनामिकालाई १०१ प्रश्न

काठमाडौँ, ८ जेठ

कांग्रेसका पूर्वमहामन्त्री विमलेन्द्र निधि ‘मिडिया फ्रेन्ड्ली’ नेताका रूपमा चिनिन्छन् । नेविसंघका पूर्वअध्यक्षसमेत रहेका उनी कांग्रेसभित्र मधेसी समुदायका प्रभावशाली नेता मानिन्छन् । उनी सभापति शेरबहादुर देउवाका विश्वासपात्र पनि हुन् । पूर्वमन्त्रीसमेत रहेका निधिका बानी र स्वभावबारे पत्नी अनामिका निधिसँग १०१ प्रश्न सोधेका छन् :

१. बिहान कति बजे उठ्नुहुन्छ ?
ठीक पाँच बजे उठ्नुहुन्छ ।

२. चिया–कफी के रुचाउनुहुन्छ ?
हामी दुवैजना दूधचिया नै खान्छौँ ।

३. एक्सरसाइज गर्नुहुन्छ कि गर्नुहुन्न ?
पौने घन्टाजति छतमा वाक गर्नुहुन्छ । यो उहाँको रुटिन नै हो ।

४. किन छतमा नि ?
बाहिर त झन् धेरै पोलुसन हुन्छ ।

५. योगा पनि गर्नुहुन्छ ?
योगा त गर्नुहुन्न ।

६. साँझमा पनि एक्सरसाइज गर्नुहुन्छ ?
साँझमा म छतमा वाक गर्छु, मलाई साथ दिन उहाँ मेरो पछि–पछि हिँड्नुहुन्छ ।

७. राति कतिखेर सुत्नुहुन्छ ?
सामान्यतया साढे नौ–दश बजेभित्र सुतिसक्नुहुन्छ ।

८. सुत्नुअघि केही खाने बानी पनि छ ?
छैन त्यस्तो त ।

९. बिहानको खाजामा के खान मन पराउनुहुन्छ ?
ह्वाइट ओट, अल्मोन्टस्, अलिकति फलफूल लिनुहुन्छ ।

१०. खानामा के मन पराउनुहुन्छ ?
रोटी, तरकारी, दाल, दही, अलिकति ब्राउन राइस खानुहुन्छ । सुगरको समस्या छ ।

११. दिउँसोको खाजामा के रुचाउनुहुन्छ ?
उसिनेको मकै, कहिलेकाहीँ गहुँको चिउराको चटपटे र मुरी कचरी बनाइदिन्छु । व्यस्तताका कारण उहाँ दिउँसो घर आउन नपाउने दिन घरमै बनाएको सुगर फ्री मिठाई खल्तीमा राखिदिने गरेकी छु ।

१२. रातिको खानामा के लिनुहुन्छ ?
राति पनि रोटी नै हो । कहिले मसला ओट, दलिया, फलफूल खानुहुन्छ ।

१३. खानामा कमेन्ट गर्ने स्वभाव कत्तिको छ ?
सन्तोष मानेर खानुहुन्छ । आफैँ भएर त कमेन्ट गर्नुहुन्न । तर, सोध्यो भने कमी–कमजोरीचाहिँ प्वाइन्ट आउट गर्नुहुन्छ ।

१४. कसले पकाउँछ खाना ?
म हाउस वाइफ त छु, त्यो पनि अरूलाई गर्न दियो भने मैले के गर्नु ?

१५. कसले पकाएको धेरै मन पराउनुहुन्छ ?
मैले पकाएको नि ।

१६. किचनमा पस्नुहुन्छ कि पस्नुहुन्न ?
पस्नुहुन्छ, रोमान्टिक बन्नुहुन्छ । अँगालो हालेर, काँधमा टाउको राखेर ‘के पाक्दै छ आज’ भनेर सोध्नुहुन्छ ।

१७. सोध्ने मात्रै कि सघाउने पनि गर्नुहुन्छ ?
त्यहीँ एकछिन गफ गर्नुहुन्छ ।

१८. आफैँ खाना पकाउन रुचि देखाउनुहुन्न ?
देखाउनुहुन्न । ‘मैले जेलमा बस्दा कस्तो मीठो खाना पकाउँथेँ, जाऊँ म पकाउन’ भनेर गफचाहिँ दिनुहुन्छ, तर अहिलेसम्म पकाउनुभएको छैन । उहाँले पकाएको मैले चाखेको पनि छैन, मैले पकाउनुस् भनेर भनेकी पनि छैन ।

१९. के–के पकाउन आउँछ रे उहाँलाई ?
दालभात, तरकारी । कटहरको तरकारी साह्रै मीठो बनाउनुहुन्थ्यो रे ।

२०. पकाएर खुवाउनुस् भनेर कहिल्यै भन्नुहुन्न ?
भनेकी छैन ।

२१. तपार्इंले पकाएको सबैभन्दा मीठो कुन परिकार मान्नुहुन्छ ?
कोलकाताको माछा, घिउमा पकाएको खसीको मासु एकदमै मीठो मान्नुहुन्छ । पहिला माछा त्यति रुचाउनुहुन्थेन । मसँग बिहे गरेपछि एकदमै मीठो मान्न थाल्नुभएको छ ।

२२. कसरी नि ?
मेरो माइती कोलकाता हो । बिहे भएपछि उहाँले ‘बंगाली श्रीमती भएपछि जहाँ जाँदा पनि माछा नै खुवाउँछन्’ भन्नुहुन्थ्यो । तर, अचेल मैले पकाएको माछा एकदमै मीठो मान्नुहुन्छ ।

२३. तपाईंंहरूको बिहे कहिले भएको हो ?
२०४८ साल असार ७ गते बिहे गरेका हौँ ।

२४. प्रेम विवाह कि मागी विवाह ?
खासमा हाम्रो लभ म्यारिज नै त होइन, तर एक–अर्कालाई मन पराएर नै बिहे भएको हो ।

२५. पहिलोपल्ट कहाँ भेट भएको दुईजनाको ?
मेरी दिदी दीपशिखाको नेपालमै बिहे भएको थियो, उहाँ अहिले माननीय हुनुहुन्छ । भिनाजु धु्रव शर्मा जनकपुरमै डाक्टर हुनुहुन्थ्यो । दसैँका वेला म दिदीको घरमा घुम्न आएका वेला उहाँसँग पहिलोपल्ट भेट भएको हो ।

२६. पहिलोपल्ट देख्दा तपाईंलाई कस्तो लाग्नुभयो ?
राम्रो लाग्नुभयो । कुर्ता–पाइजामा र हाफ फतुवा लगाउनुभएको थियो, हल्का दाह्री थियो । राम्रो देखिनुभएको थियो । शालीन स्वभाव थियो ।

२७. कुराकानी कसरी भयो ?
दसैँका वेला पारिवारिक जमघटजस्तो थियो । त्यहाँ पनि उहाँले गजल गाउनुभयो । त्यहीँ चिनजान भयो । म कोजाग्रत पूर्णिमाका दिन फर्किंदै थिएँ, उहाँले ‘कोजाग्रतकै दिन नफर्किनू, बस्दा राम्रो हुन्छ नि’ भनेर भन्नुभयो ।

२८. त्यसपछि भेटघाट–संवाद भइरह्यो कि टुट्यो ?
म फर्केपछि त कहाँबाट भेटघाट हुनु ? अमेरिकाको संविधानका बारेमा अध्ययन गर्ने एउटा कार्यक्रमका लागि उहाँ अमेरिका जानुभएछ । पछि त्यहीँबाट कोलकाता हाम्रो घरमा फोन गर्नुभयो । म छक्क परँे ।

२९. के भन्नुभएको थियो त्यतिवेला, अहिले याद छ ?
किन नहुनु नि ? मैले ‘के गर्दै हुनुहुन्छ अमेरिकामा’ भनेर सोधेपछि उहाँले ‘यहाँको संविधानको बारेमा अध्ययन गर्न आएको, अब फर्केपछि हामी पनि संविधान बनाउँछौँ र तिमीलाई पनि नेपाली नागरिक बनाउँछु’ भन्नुभयो । मलाई त्यो बहुत रमाइलो लाग्यो ।

३०. प्रेमप्रस्ताव कसले पहिला राख्नुभयो ?
त्यस्तो प्रस्ताव नै राख्नुपरेन । उहाँँले ‘तिमीलाई नेपाली नागरिक बनाउँछु’ भनेर घुमाउरो शैलीमा सबै कुरा भन्नुभयो । म पनि मास्टर पढ्दै गरेकी थिएँ, नबुझ्ने कुरै थिएन । एक किसिमले साइलेन्ट लभ थियो । त्यसपछि पनि वेला–वेला फोन गरिराख्नुहुन्थ्यो । कुनै मान्छेले किन यसरी फोन गरिराखेको छ भन्ने त सजिलै बुझ्न सकिन्छ नि (हाँसो) ।

३१. अनि, घरमा बिहेको कुरा कसरी चल्यो त ?
मेरो भिनाजुले घरमा प्रस्ताव ल्याउनुभयो । ‘केटा राम्रो छ, मलाई पनि मन परेको छ’ भन्नुभयो ।

३२. बुबाआमाले सजिलै मान्नुभयो ?
उहाँहरूले मलाई पनि सोध्नुभयो, मैले पनि ठिकै छ भनेँ ।

३३. त्यसपछि त दुईजनाको भेटघाट हुन थाल्यो होला नि ?
भएन । उहाँ उता आउनुभएन, म यता आइनँ । एकैपटक बिहेमा भेट भयो । बिहेअघि त्यहीँ दिदीको घरमा एकपल्ट मात्रै भेट भएको थियो ।

३४. बिहे कहाँ गर्नुभयो ?
बिहे त जनकपुरमै भयो । उहाँहरू यताबाट जाँदा धेरै जानुपथ्र्यो । हामी नै उताबाट आयौँ र दिदीको घरमा बिहे भयो ।

३५. तपाईंहरू जनकपुर आएपछि पनि बिहेअघि भेट भएन दुईजनाको ?
भएन । बरु, उहाँको बुबा (महेन्द्रनारायण निधि) सगुन लिएर आउनुभएको थियो ।

३६. ससुराले के भन्नुभयो त ?
मैले पकाएको एक कप चिया खानुभयो, आशीर्वाद दिनुभयो । अनि ‘विमलेन्द्रले ठीक केटी रोजेछ’ भन्नुभयो । उहाँ कांग्रेसको नेता हुनुहुन्थ्यो । बिहेको पार्टीमा पनि कृष्णप्रसाद भट्टराई, गणेशमान सिंहलगायतका कांग्रेसका सबै नेता आउनुभयो, कोइरालाहरू मात्रै आउनुभएन ।

३७. कोलकाताबाट बिहे गरेर जनकपुर आउनुभयो, परिवारमा घुलमिल हुन कत्तिको गाह्रो भयो ?
मलाई सबैले माया गर्नुहुन्थ्यो, त्यसैले घुलमिल हुन धेरै अप्ठ्यारो भएन । सबैभन्दा पहिला मैले मैथिली र नेपाली भाषा सिकेँ ।

३८. चुरोट–खैनी खानुहुन्छ कि खानुुहुन्न ?
अहिले त केही पनि खानुहुन्न ।

३९. पहिला चुरोट खानुहुन्थ्यो ?
पहिला त चेन स्मोकर नै हो रे, दिनमा एक बट्टा सक्काउने । बिहे हुनुअघि नै छाड्नुभएको हो ।

४०. खैनी पनि खानुहुन्थ्यो ?
खैनी त बिहेपछि पनि खानुहुन्थ्यो । घरमा कुना–कुनामा लुकाएर राख्नुहुन्थ्यो । मैले पनि छाड्न भनँे । अचेल त्यो पनि खानुहुन्न ।

४१. रक्सी खानुहुन्छ कि खानुहुन्न ? कुन रक्सी खानुहुन्छ ?
साथीभाइहरूसँग बसेका वेला, पार्टीहरूमा खानुहुन्छ । ब्ल्याक लेबल, सिवास रिगल खानुहुन्छ ।

४२. रक्सीले मातेपछि कहिलेकाहीँ झगडा पर्छ कि पर्दैन ?
पर्दैन । दुई पेगभन्दा धेरै खानुहुन्न । पिएपछि त झन् ‘इन्टिलेक्च्युअल’ बन्नुहुन्छ ।

४३. रोमान्टिक कत्तिको हुनुहुन्छ ?
बाहिर हेर्दा त्यस्तो देखिनुहुन्न है ? तर, साह्रै रोमान्टिक हुनुहुन्छ ।

४४. कतिवेला रोमान्टिक मुडमा देखिनुहुन्छ ?
राजनीतिक सफलता पाउँदा, घरपरिवार, साथीभाइलाई राम्रो हुँदा ह्याप्पी बन्नुहुन्छ ।

४५. उहाँले दाह्री पालेको तपाईंलाई मन पर्छ कि पर्दैन ?
एकदमै मन पर्छ नि । त्यही भएर त मैले उहाँलाई दाह्री काट्न नै दिन्नँ ।

४६. सिनेमा हेर्न कति मन पराउनुहुन्छ ?
सिनेमा हेर्न त एकदमै मन पराउनुहुन्थ्यो । पहिला–पहिला धेरै हेर्नुहुन्थ्यो ।

४७. कस्ता फिल्म रुचाउनुहुन्छ ?
अधिकांश चर्चित सिनेमाहरू, सामाजिक कथा भएका सिनेमा हेर्नुहुन्छ ।

४८. टेलिभिजनमा पनि हेर्नुहुन्छ ?
कहिलेकाहीँ हेर्नुहुन्छ । मैले रोजेको सिनेमा बाध्य भएर पनि हेर्नुहुन्छ । रिमोट मेरै हातमा हुन्छ ।

४९.  परिवारका सदस्यसँग बसेर फिल्म कति हेर्नुहुन्छ ?
कहिलेकाहीँ हेर्नुहुन्छ ।

५०. बूढाबूढी सँगै हलमा गएर सिनेमा कत्तिको हेर्नुहुन्छ ?
हेर्छौँ कहिलेकाहीँ ।

५१. पछिल्लोपटक कुन सिनेमा हेर्नुभयो ?
ठ्याक्कै याद छैन । तीन–चार वर्ष भयो नहेरेको ।

५२. टेलिभिजनमा सिरियल हेर्नुहुन्छ कि हेर्नुहुन्न ?
पहिला त हेर्नुहुन्थ्यो । सरकार ढलेपछि त्यसमा ब्रेक लागेको छ ।

५३. कुन सिरियल हेर्नुहुन्थ्यो ?
बालिका बधु हेर्नुहुन्थ्यो ।

५४. गीत कत्तिको सुन्नुहुन्छ ?
ए, गीत त एकदमै सुन्नुहुन्छ । उहाँले धेरै सुन्ने गजलहरू हो, पुराना गीतहरू पनि सुन्नुहुन्छ ।

५५. कसका गजलहरू धेरै सुन्नुहुन्छ ?
मेहन्दी हसन, गुलाम अलीका सुन्नुहुन्छ । पहिला–पहिला त गजल लेख्नु पनि हुन्थ्यो ।

५६. कति लेख्नुभएको छ गजल ?
धेरै लेख्नुभएको छ, जेलमा हुँदा, बाहिर हुँदा उहाँले लेखेका केही डायरी अहिले पनि राखेकी छु । जवान हुँदा त के–के लेख्नुभएको होला नि (हाँसो) ।

५७. गुनगुनाउने कत्तिको गर्नुहुन्छ ?
एकदमै गुनगुनाउनुहुन्छ । कहिलेकाहीँ त हामी सुत्दाखेरि ओछ्यानमा पनि गीत–गजल गुनगुनाउँदै सुत्छौँ ।

५८. कस्तो गाउनुहुन्छ ?
एकदमै मीठो गाउनुहुन्छ, उर्दु शब्दहरू बहुतै राम्रो गरी समात्नुहुन्छ । ‘चन्दन सा बदन, चञ्चल सा चित्त मन…’ उहाँले धेरै गुनगुनाउनुहुन्छ ।

५९. आफूले लगाउने लुगामा कत्तिको सचेत हुनुहुन्छ ?
सचेत नै हुनुहुन्छ । लुगा त उहाँले सबै मैले रोजेको र दिएको मात्रै लगाउनुहुन्छ । बारअनुसार ‘कलर’ मिलाएर लुगा दिने गर्छु । कहिलेकाहीँ म किचनमा छु र उहाँ बाथरुमबाट नुहाएर निस्कनुभयो भने पनि लुगा नलगाएर ‘टावेल’ लपेटेर मात्रै बस्नुहुन्छ । लुगाका लागि मलाई कुरेर बस्नुहुन्छ ।

६०. कुन बार कस्तो रङको लुगा दिनुहुन्छ ?
(हाँसो) आइतबार पहेँलो, सोमबार रातो, शनिबार कालो रङको लुगा लगाउन दिने गर्छु ।

६१. किन नि बारअनुसार रङ छुट्याउनुभएको ?
केही धार्मिक मान्यता, केही रोजाइ हो ।

६२. के लगाउन रुचाउनुहुन्छ ?
कहाँ कस्तो कार्यक्रममा जाँदै हुनुहुन्छ, हेरी–हेरी हुन्छ । सामान्यतया कोट, बन्डी, कुर्ता, पाइजामा मन पराउनुहुन्छ ।

६३. लुगामा आइरन गर्न जान्नुहुन्छ कि जान्नुहुन्न ?
जान्नुहुन्न । अहिलेसम्म लगाउनुभएको छैन । सधैं हामीले लगाइदिन्छौँ ।

६४. आफ्नो लुगा आफैँ किन्नुहुन्छ कि अरूले किनिदिनुपर्छ ?
धेरै त मैले नै किनिदिन्छु । कहिलेकाहीँ दुईजना सँगै गएर पनि सपिङ गर्छौँ ।

६५. कुन ब्रान्डका लुगा मन पराउनुहुन्छ ?
यही ब्रान्ड भन्ने छैन । कम्फर्टेबल र राम्रो भए हुन्छ ।

६६. आफ्नो तलब तपाईंलाई दिनुहुन्छ कि आफैँ राख्नुहुन्छ ?
जम्मै मलाई नै ल्याएर दिनुहुन्छ ।

६७. आफूले कत्ति पनि राख्नुहुन्न ?
मैले नै उहाँको पर्स हेरेर राखिदिन्छु ।

६८. कति दिनुहुन्छ पकेटखर्च ?
पाँच हजारजति राखिदिन्छु ।

६९. खर्च केमा गर्नुहुन्छ ?
धेरै खर्च नै गर्नुहुन्न । गाडीमा तेलको व्यवस्थापन पनि मैले नै हेरिदिन्छु । ड्राइभर, सहयोगी, पिएसओहरूलाई चिया–खाजामा त हो नि खर्च हुने । समय हुँदा उहाँ खाजा खान घरमै आउनुहुन्छ ।

७०. पैसाको बारेमा बूढाबूढीबीच कहिल्यै किचलो भएको छ कि छैन ?
छैन त्यस्तो त ।

७१. रिसाउने बानी कति छ ?
एकदमै छैन भन्दा पनि हुन्छ । बरु, ‘किन रिसाउनुहुन्न’ भनेर उल्टै म रिसाउँछु (हाँसो) ।

७२. कस्ता कुरामा रिसाउनुहुन्छ ?
रिसाउनु नै हुन्न के । कहिलेकाहीँ सामान्य मात्र हो ।

७३. रिसाएपछि के गर्नुहुन्छ ?
नबोलेर, पत्रिका पढेर, एफएम सुनेर बस्नुहुन्छ ।

७४. रिसाएपछि कसले पहिला फकाउँछ ?
उहाँ ‘खाना के पाक्दै छ’ भनेर बोल्न आउनुहुन्छ ।

७५. अरूको रिस घरमा कत्तिको रिफल्याक्ट हुन्छ ?
हुँदैन त्यस्तो त ।

७६. रिसले वा मायाले तपाईंलाई कहिल्यै पिट्नुभएको छ ?
छैन ।

७७. माया गरेर तपाईंलाई के भनेर बोलाउनुहुन्छ ?
‘बाबु’ भन्नुहुन्छ ।

७८. तपाईंले चाहिँ के भनेर सम्बोधन गर्नुहुन्छ ?
मैले पनि ‘बाबु’ नै भन्छु ।

७९. तपाईंलाई उपहार कत्तिको दिनुहुन्छ ?
दिनुहुन्छ वेला–वेलामा । पफ्र्युम, कपडा, घडी दिनुहुन्छ ।

८०. विदेशबाट आउँदा केही ल्याइदिनुहुन्छ कि हुन्न ?
केही न केही त ल्याइदिनु नै हुन्छ । जिल्लाहरूमा जाँदा पनि ल्याउनुहुन्छ । सिन्धुली जानुभयो भने जुनार ल्याएर आउनुहुन्छ, त्रिशूली जानुभयो भने माछा ल्याउनुहुन्छ ।

८१. जन्मदिन, म्यारिज एनिभर्सरीमा विस गर्नुहुन्छ कि बिर्सनुहुन्छ ?
एकदम सम्झेर विस गर्नुहुन्छ, उपहार दिनुहुन्छ ।

८२. उहाँले ल्याइदिएको तपाईंलाई सबैभन्दा मन परेको उपहार के हो ?
साडीहरू छन्, मैले अहिले पनि राखेकी छु ।

८३. सहयोगी कत्तिको हुनुहुन्छ ?
एकदमै सहयोगी हुनुहुन्छ । एकदमै इमोसनल हुनुहुन्छ, मेरो दु:खको कुरा भन्नैपर्दैन, मलाई के चाहिन्छ आफैँ बुझ्नुहुन्छ ।

८४. भान्सामा के गरेर सघाउनुहुन्छ ?
भान्सामा त आएर एकछिन गफ गर्नुहुन्छ ।

८५. लुगा धुन कहिल्यै सघाउनुभएको छ कि छैन ?
उहाँले सघाउन खोजे पनि मैले उहाँलाई गर्न दिएकी छैन, अह्राएकी छैन ।

८६. तपाईंका लुगामा कहिल्यै आइरन गरिदिनुभएको छ ?
त्यो पनि छैन ।

८७. कुनै काम पनि उहाँलाई गर्न दिनुहुँदो रहेनछ, किन नि ?
माया लाग्छ उहाँको (हाँसो) ।

८८. परिवारलाई कति समय दिनुहुन्छ ?
समय व्यवस्थापन उहाँको एकदमै राम्रो छ । पार्टी, कार्यकर्ता, परिवार सबैलाई समय मिलाउनुभएको छ ।

८९. परिवारलाई कति वेला समय दिनुहुन्छ ?
यतिवेला नै भन्ने छैन । बिहान, दिउँसो, बेलुका मिलाउनुहुन्छ ।

९० जोकहरू सुन्ने–सुनाउने कत्तिको गर्नुहुन्छ ?
ए एकदमै हुन्छ । मैले पोलिटिकल जोक, गसिप सुनाउँछु, मन खोलेर हाँस्नुहुन्छ । उहाँले पनि जोकहरू सुनाउनुहुन्छ ।

९१. पार्टीका कुराहरू तपाईंसँग कत्तिको सेयर गर्नुहुन्छ ?
भन्नुहुन्छ, तर म धेरै चासो राखेर कोट्याउँदिनँ । हाम्रो त एकदम स्पष्ट कुरा छ, मेरो किचनमा उहाँले र उहाँको राजनीतिमा मेरो कुनै हस्तक्षेप वा आग्रह हुँदैन । फेरि अहिले कुनचाहिँ राजनीतिक कुरा बाहिर नआएर लुकेको हुन्छ र ? बाहिरैबाट थाहा हुन्छ भने उहाँलाई किन कोट्याउने (हाँसो) ?

९२ भनेपछि उहाँ घर आउनुभन्दा अगाडि नै तपाईं ‘अपडेट’ भइसक्नुहुन्छ ?
पढेलेखेकी मान्छे हुँ, राजनीतिक घटनाक्रममा अपडेट भइहालिन्छ नि । त्यसमाथि एउटा राजनीतिज्ञकी पत्नी हुँ, स्वाभाविक रूपमा चासो राखिहाल्छु नि ।

९३. विदेश जाँदा तपाईंलाई सँगै लैजान कत्तिको मन पराउनुहुन्छ ?
एकदमै मन पराउनुहुन्छ । ‘तिमी भयौ भने सजिलो हुन्छ’ भन्नुुहुन्छ ।

९४. कुन–कुन देश सँगै जानुभएको छ ?
धेरै ठाउँ गइयो । युरोप, अमेरिका, जापान, स्विट्जरल्यान्ड, थाइल्यान्ड धेरैतिर गइयो ।

९५. सँगै विदेश जाँदा घुमघाम–रमाइलो कत्तिको गर्नुहुन्छ ?
उहाँले जानुअघि नै त्यताको कार्यक्रम र घुमघामको सेड्युल बनाउनुहुन्छ । कार्यक्रम, त्यहाँ रहेका नेपाली साथीभाइसँगको भेटघाटपछि घुमघाम हुन्छ । अमेरिका जाँदा एकपटक समुद्री तटमा गएका थियौँ, त्यहाँ रमाइलो गरिरहेका सबैको लुगा त्यहीँको वातावरणअनुसार थियो, पूरा लुगा लगाउने हामी मात्रै थियौँ ।

९६. पत्रपत्रिका कत्तिको पढ्नुहुन्छ ?
एकदमै पढ्नुहुन्छ, हरेक दिन घरमा डेढ–दुई किलो पत्रिका आउँछन् । सबै पत्रिकाका सम्पादकीय पनि पढ्नुहुन्छ ।

९७. टेलिभिजनमा समाचार कत्तिको हेर्नुहुन्छ ?
बिहान र बेलुका हेर्नुहुन्छ । एफएममा समाचार सुन्नुहुन्छ ।

९८. आफ्नोबारेमा आएका समाचार हेरेपछि कस्तो प्रतिक्रिया जनाउनुहुन्छ ?
केही प्रतिक्रिया नै जनाउनुहुन्न । मैले ‘यस्तो आएछन् नि’ भनेर पनि भन्छु, तर उहाँले केही भन्नुहुन्न ।

९९. जिद्दी गर्ने स्वभाव कत्तिको छ ?
घरमा त होइन, कहिलेकाहीँ पोलिटिकल कुराहरूमा अडान राख्नुहुन्छ ।

१००. कस्ता कुरामा जिद्दी गर्नुहुन्छ ?
उहाँलाई ठीक लागेका कुरामा तर्कसहित प्रस्तुत हुनुहुन्छ ।

१०१. त्यस्तो वेला सम्झाउन कत्तिको गाह्रो हुन्छ ?
तर्कसहित कन्भिन्स गर्नुपर्छ । मिहिनेत गर्नुपर्छ ।
नयाँ पत्रिकाबाट