हामी एक्लो भयौं, कसैले साथ दिएनन्, धर्म निरपेक्षता दुर्भाग्यपूर्ण:कमल थापा

काठमाडौं, २८ भदौ । राष्ट्रिय प्रजातन्त्र पार्टीका अध्यक्ष कमल थापाले नयाँ संविधानमा हिन्दू राज्य उल्लेख हुनुपर्ने मागसहित प्रस्तुत गरेको संसोधन प्रस्ताव संविधानसभाबाट अस्वीकृत भएपछि उनले यसलाई दुर्भाग्यपूर्ण भनेका छन् ।

सामाजिक सञ्जाल फेसबुकबाट आफ्नो धारणा सार्वजनिक गर्दै थापाले धर्म निरपेक्षता कायम रहनु दुर्भाग्यपूर्ण रहेको दावी गरे ।

उनले फेसबुकमा लेखेका छन्, ‘संविधानमा हिन्दूराष्ट्रको पहिचान समाप्त गरि धर्म निरपेक्ष कायम गर्ने संविधानसभाको निर्णय दुर्भाग्यपूर्ण छ । नेपाली जनताको भावनामाथि कुठाराघात भयो ।’


साथै उनले आफूहरुलाई कसैले साथ नदिएको भन्दै दु:ख पनि व्यक्त गरेका छन् । आजै आफ्नो प्रस्ताव अस्वीकृत भएपछि थापाले फेसबुकमा लेखेका छन्, ‘आदरणीय नेपाली दाजुभाइ दिदीबहिनीहरु ! संविधानमा हिन्दूराष्ट्र कायम गर्न हामी असफल भयौं । हामी एक्लो भयौँ । अखण्ड पार्टीबाहेक कसैले साथ दिएनन्, दु:खी छौं ।

थापाले विदेशीको दवावमा काँग्रेस, एमाले र एमाओवादीले हिन्दू राष्ट्रको पहिचान समाप्त पारेको आरोप लगाएका छन् । उनले अर्को स्टाटसमा लेखेका छन्, ‘करौडौं नेपालीहरुको चाहनाविपरित विदेशीको दवावमा गणितिय आधारमा फेरि पनि हिन्दू राष्ट्रको पहिचान समाप्त पार्ने काममा कांग्रेस, एमाले र एमाओवादी एकभए ।’

 थापाको प्रस्ताव संविधानसभाको दुई तिहाईको ध्वनी मतले अस्वीकृत गरिदिएको थियो ।

भिडियो हेर्न तल क्लिक गर्नु होस :