गोरखामा बस दुर्घटना, ३ जनाको मृत्यु, उद्धार कार्य चल्दै

 गोरखा, भदौ १४ - गोरखामा भएको बस दुर्घटनामा ३ जनाको ज्यान गएको छ ।
आरुघाटबाट गोरखाबजार आउँदै गरेको ना ४ ख १३९५ नम्बरको बस बगुवा गाविस ३ खान्चोक नजिकै सडकबाट तल खसेर दुर्घटना हुँदा ३ जनाको घटनास्थलमै ज्यान गएको हो ।
ज्यान गुमाउनेमा एक जना बालक र अरु २ जना २२-२५ वर्षका महिला छन् । उनीहरुको परिचय खुलेको छैन ।
घटनास्थलमा रहेका सामाजिक कार्यकर्ता नवराज पोखरेलका अनुसार बसमा ४० जना भन्दा धेरै यात्री थिए । जसमध्येका १५ जना घाइते भएका छन् । घाइते मध्ये ४ जनाको अवस्था गम्भीर छ ।
पोखरेलका अनुसार बस खसेपछि चालक भागेका छन् । स्थानीयबासिन्दा र प्रहरीले उद्धार गरी घाइतेलाई उपचारका लागि गोरखा सदरमुकाम ल्याइँदै छ ।
भिडियो हेर्न तल क्लिक गर्नुहोस :